Real Madrid yo muri Espagne yatomboye Manchester City yo mu Bwongereza muri ⅛ cya UEFA Champions League nyuma ya tombola yabaye kuri uyu wa Gatanu, tariki ya 27 Gashyantare 2026.
Ni ku nshuro ya kabiri UEFA Champions League iri gukinwa mu buryo buvuguruye, aho amakipe ya mbere yabonye itike ya ⅛ binyuze mu mikino yakinwe mu buryo bwa League.
Amakipe atarabonye itike ku nshuro ya mbere yagize amahirwe yo gukina iya kamarampaka, yakuranywemo hagati yayo haboneka andi umunani azakina iki cyiciro mbere y’uko habaho tombola.
Iyi tombola yabereye i Nyon mu Busuwisi yayobowe n’umunyabigwi mu mupira w’amaguru, Ivan Rakitić, wakiniye Ikipe y’Igihugu ya Croatia na FC Barcelone, yasize Real Madrid ihuye na Manchester City.
Ni umukino ukomeye muri iki cyiciro kuko aya makipe yombi atari ubwa mbere agihuriyemo, ndetse yombi akaba amaze kuba amakeba ku ruhando mpuzamahanga.
Aya makipe aheruka guhura ku mukino w’Umunsi wa Gatandatu wa UEFA Champions League, icyo gihe Manchester City ikaba yaratsinze Real Madrid ibitego 2-1.
Ubwo yahuriraga muri ⅛, Real Madrid yasezereye Man City ku giteranyo cy’ibitego 6-3, kuko umukino wa mbere warangiye ari 2-3, uwo kwishyura urangira ari 3-1.
Andi makipe akomeye yatomboranye harimo Paris Saint-Germain izahura na Chelsea, Galatasaray na Liverpool, Atalanta na Bayern Munich, Newcastle na FC Barcelone, Atletico Madrid na Tottenham, FK Bodø/Glimt na Sporting CP ndetse Bayer Leverkusen na yo ihure na Arsenal.
Imikino ibanza y’amakipe yose izaba hagati ya tariki 10 na tariki 11 Werurwe 2026, mu gihe iyo kwishyura izaba tariki ya 17 Werurwe 2026.
