Ubushakashatsi bwerekana ko kuryama amasaha ari hagati ya karindwi n’icyenda buri joro bishobora kugabanya agahinda muri rusange ku kigero cya 22%.
Ubu bushakashatsi bukomeza gushimangira akamaro k’ibitotsi ku buzima bwo mu mutwe n’ubw’umubiri, bwerekana ko kutabona ibitotsi bihagije bishobora kugira ingaruka zikomeye ku buzima bw’umuntu, harimo kongera umubabaro, umunaniro, n’izindi ndwara zishamikiye ku mutima n’ubwonko.
Kuryama amasaha 7-9 buri joro ni urugero rwashyizweho n’abashakashatsi bagendeye ku bushobozi bw’umubiri bwo kongera imbaraga no gusana uturemangingo twangijwe mu masaha umuntu aba ari maso. Mu gihe umuntu asinziriye bihagije, ubwonko bwe bushobora gukora neza mu kugenzura amarangamutima, kugabanya ingaruka z’ubwoba, no kwihanganira ibibazo by’ubuzima.
Iyo umuntu adasinzira neza, aba afite ibyago byo kugira ikibazo cyo kwiheba no guhangayika, ibyo bikaba bishobora no kugera ku rwego rwo kwiyahuza no kwangiza ubuzima bwe bwose Iyi mibare ivuga ko kugabanya umubabaro ku kigero cya 22% bishobora kugaragaza uruhare rukomeye rw’ibitotsi bihagije mu kugabanya ingaruka z’ibibazo byo mu mutwe. Abashakashatsi basanze iyo umuntu asinziriye igihe gihagije, ubushobozi bw’ubwonko bwo kwigenzura no kugenzura ibice bifite aho bihuriye n’ibyiyumvo burushaho kuba bwiza.
Urugero, ahantu hitwa amygdala mu bwonko, hafite inshingano yo kugenzura amarangamutima. Iyo hatabonye akaruhuko k’ibitotsi bihagije, imikorere yaho irahungabana, bigatuma umuntu agira amarangamutima ashyuha, nk’umujinya, agahinda kenshi, cyangwa kwiheba.
Iyo umuntu adasinzira amasaha akwiye, ahura n’ingaruka zirimo:
Kwiheba: Kutaryama neza bituma ubwonko butabona umwanya wo gutuza no gutekereza neza, bigatuma umuntu ahura n’amarangamutima yo kwiheba.
Umuhangayiko: Iyo utaryamye neza, ibyiyumvo bibi biragwira, bikaba byatuma ushobora kwibona nk’uri mu ngorane udashobora guhangana nazo.
Kubura Imbaraga: Umubiri udafite ibitotsi bihagije ntushobora gukora neza mu kugenzura imyuka no gusohora uburozi bw’ibitekerezo bibi.
Ibitotsi bigira uruhare mugutuma umuntu agira ubuzima bwiza bwo mu mutwe. Hari ibikorwa byinshi bishimangira uruhare rw’ibitotsi mu gutuma umuntu agira ubuzima bwiza bwo mu mutwe. Nko ku bantu bafite indwara zo kwiheba, kubona ibitotsi bihagije byagaragaye ko bigabanya ibimenyetso by’indwara ku kigero cyo hejuru. Iyo usinziriye neza, imikorere y’ubwonko mu guhanga udushya, gutekereza neza, no gukemura ibibazo irushaho kuba myiza. Ibi bituma umuntu abasha kwihanganira ingorane z’ubuzima atinjira mu rujijo rw’amarangamutima.
Kugira ngo umenye neza nuko uryama amasaha 7-9 buri joro, dore bimwe mu byagufasha:
Kugira gahunda ihamye: Jya uryama no kubyuka mu gihe kimwe buri munsi, harimo no mu minsi y’impera z’icyumweru. Kwirinda ibirangaza: Hagarika gukoresha ibikoresho by’ikoranabuhanga n’amatelefone mbere y’isaha imwe ngo uryame.
Kugabanya ibinyobwa bifite caffeine: Irinde kunywa icyayi, ikawa, cyangwa ibinyobwa bifite caffeine nijoro kuko bishobora guhungabanya ibitotsi.
Kwitoza gukora imyitozo ngororamubiri: Imyitozo ngororamubiri irushaho kunoza ireme ry’ibitotsi, ariko shyira intera hagati y’imyitozo na gahunda yo kuryama.
Kuki Ibitotsi bihagije ari ngombwa? Kuryama amasaha ahagije buri joro si iby’inyungu ku mubiri gusa, ahubwo ni n’inyungu ku buzima bwo mu mutwe. Iyo ubona umwanya wo kuryama bihagije, ubwonko bwawe buhinduka ubukomeye kandi bufite ubushobozi bwo guhangana n’ibibazo by’ubuzima. Ibi bituma umuntu agira ubuzima bwiza muri rusange, kandi bigatanga icyizere cyo kugabanya umubabaro no kwirinda indwara zijyana n’ibitotsi bikeya.
Muri make, kuryama amasaha 7-9 buri joro si icyifuzo gusa, ahubwo ni ingenzi mu rugendo rwo kugira ubuzima bwiza bwo mu mutwe no mu mubiri. Kwita ku bitotsi ni kimwe mu byemezo byiza ushobora gufata kugira ngo ubungabunge ubuzima bwawe.
