Bimwe mu byo abahanga bemeza ko bitera kubabara umugongo

Kubabara umugongo bya hato na hato bikunda kuba ku bantu batari bake kuko abaganga bemeza ko 80% by’abatuye Isi bakunda guhura n’iki kibazo umunsi ku munsi.

Ahanini rero usanga ikibazo cyo kubabara umugongo ngo giterwa n’uburyo abantu bawukoresha ariko mu buryo bunyuranije n’amategeko ari nabyo bibatera kubabara bya buri kanya. Ese ni iki wakorera umugongo wawe ukawurinda kubabara?

Bimwe mu byo abahanga bemeza ko bitera umugongo kubabara bityo bikaba bikwiye kwirindwa na buri wese harimo ibi bikurikira:

1. Kwirinda kwicara ugonze umugongo
Abantu benshi bakunda kumara amasaha menshi cyane bicaye imbere ya za mudasobwa, ibintu bituma rimwe na rimwe bashobora kwicara nabi kubera umwanya munini baba bicaye ari nabyo bituma bagonda umugongo bityo bikabaviramo ububabare bukabije. Mu rwego rwo kwirinda ubwo bubabare rero ni byiza kwicara umugongo wemye neza mu gihe udafite ubundi buryo bwo guhaguruka, ibyo bizakurinda bwa bubabare bw’umugongo.

2. Kwirinda gusobekeranya amaguru
Mu gihe cyose wicaye kandi ukumva ubabara umugongo, si byiza kwicara usobekeranije amaguru kuko nubwo bibuza amaraso gutembera neza mu mubiri ariko binatuma ububabare bw’umugongo bwiyongera bityo urutirigongo rukagenda rwangirika buhoro buhoro bikanatuma mu gihe ugenda wumva ubabara cyane. Kugira ngo wirinde izi ngaruka rero, mu gihe wicaye gerageza gutandukanya amaguru cyane bizagufasha kwicara umugongo wemye bityo bikurinde ububabare bwa wa mugongo.

 3. Kwirinda gutoragura ikintu amaguru afatanye
Mu gihe hari ikintu ushaka gutora hasi si byiza na gato kugitora wegeranije amaguru kuko byangiza cyane urutitigongo, niba ushaka guca bugufi gerageza utandukanye amaguru cyangwa se ubanze upfukame ubundi uhine umugongo aho kugira ngo ubikore uhagaze andi wegeranije amaguru.

4. Kwirinda guterura ibintu biremereye cyane
Si byiza guterura ibintu biremereye kuko ubusanzwe byangiza urutirigongo ari nabyo bikuviramo ububabare bukabije, mu gihe utabasha guterura ikintu kiremereye wenyine, saba ubufasha ku bandi bantu niba byanze ugerageze guterura ariko amaguru atandukanye.

5. Kwirinda guhagarika siporo
Abantu benshi bibwira ko bakwiye guhagarika imyitozo ngororangingo mu gihe cyose bumva bababara umugongo ariko burya si byo kuko iyo uyihagaritse ububabare bw’umugongo buriyongera. Ni byiza rero gukomeze gukora imyitozo ngororangingo kuko abahanga bavuga ko uburyo bwiza bwo kwirinda umugongo ari ukuwunyeganyeza buhoro buhoro. Ibi byose nubikurikiza, umugongo uzabigushimira, ukwiture kutakurya ibihe byose.

Source: https://www.apollohospitals.com